INC. AUCT. GLOSSAE. Quod mare fluviorum accursu non augetur, dicunt naturaliter salsis vadis fluentum dulce consumi. Utrum ventorum spiritu aquae erigantur, an lunari cursu increscant, an sole trahente decrescant, hoc Deo soli cognitum est, cuius et opus mundus, solique omnis mundi ratio nota est. Oceani autem magnitudo incomparabilis, et intransmeabilis, latitudo prohibetur. Mundi philosophi aiunt, quod post Oceanum terra nulla sit, sed solo denso aere nubili contineatur mare, sicut et terra subterius. Salomon autem dicit: Ad locum autem unde exeunt flumina revertuntur. Unde intelligitur, mare non crescere, quod etiam per quosdam occultos meatus aquae revolutae in fontes suos refluant, et solito cursu super suos amnes recurrant. Mare propterea factum est, ut omnium cursus fluminum recipiat. Cuius cum sit altitudo diversa, indiscreta est tamen dorsi eius aequalitas. Unde et aequor appellatum creditur, quod superficies eius aequalitas sit. Physici autem dicunt mare altius esse terris.

IOAN. NOV. SCHOLIA. Salsis vadis fluentum dulce consumi. Scilicet prae calore, quod idem et cineres efficiunt.

Vapore solis absumi. In hac sententia est Aristoteles libro II Meteorologiae.

Lacis lacunisque. Id est lacubus, utroque enim modo dicitur. Est hoc videre in paludibus quae, hiberno imbre stagnantes, aestate a sole desiccantur.

Vel etiam occulto meatu in suos refluere fontes. Quemadmodum scriptum est in Ecclesiaste: Omnia flumina intrant in mare, et mare non redundat. Ad locum enim unde exeunt flumina, revertuntur, ut iterum fluant.